How to…黐箭托

呢篇How to嘅第一篇，之前無諗過有需要寫呢啲文，因為覺得裝組器材呢啲知識應該留番教練教。咁但係教練又喺邊度學返嚟？自然就係喺教練嘅教練度學。當然係有英文資源有講嘅，有文字亦都有Youtube片，又或者本身產品嘅說明書好多時都有寫少少，但中文資訊就好似真係無乜。咁啱見到網上有訴求，諗深一層，其實都啱嘅，如果冇人寫低呢啲知識，其實自己學返嚟嘅都唔sure同人哋嘅有冇分別，又或者大家各自做法有少少分別自己都為意，因為冇跡可尋。

箭托決定箭喺弓上面嘅位置，黐箭托時要留意嘅就係調整箭托嘅兩個方向：出入同埋高低位置，大部份金屬箭托上嘅棍仔可以調整，相對比較簡單，因為即使黐得唔完美都可以再調較支棍仔位置，但係膠箭托 / 簡單版金屬箭托就無辦法可以調整。而出入同高低兩者都係同調弓有關，即係話會同其他嘢互相有影響，最壞嘅情況係黐完之後調弓時要搣番出嚟再黐過，所以有budget嘅話揀粒有得調嘅會方便好多。以下我將會講cheap cheap膠墊托同埋細隻嘅金屬箭托需要留意嘅位。

高低位置

受箭桿直徑粗幼影響。

中間或輕微偏低可接受

目標係想令箭桿位於箭側墊洞口的正中間，輕微偏低可以接受，但不接受偏高，因為夾箭時將會更容易令到箭桿跳到箭側墊上。

偏高，唔建議

由於膠箭托 / 簡單版金屬箭托冇辦法調較高度，如果用直徑比較幼嘅箭桿時，有機會需要將箭托打斜貼，先可以令到箭托對準箭側墊洞嘅同時，能夠將箭桿對準度箭側墊正中央。礙於唔美觀，有人會想偷少少位貼高啲個箭托而唔打斜貼，我就唔建議，因為有較大機會黐得唔好而阻礙箭側墊運作，要小心檢查清楚。

而調較可調整金屬條款式的箭托時就需要留意，會唔會喺調整出入時誤將箭托高低改變，因為份型號部嘅箭托金屬條係斜嘅而唔係水平，當調整出入時就會同時改變金屬條接觸箭桿的位置，令高低位置改變。

出入位置

受弓片中線、箭桿直徑粗幼及箭側墊出入影響。建議先預調好弓片直線、箭側墊出入後再調整或覆檢箭托出入位置。

金屬棍仔唔好突出箭桿外

目標係金屬棍仔剛好承托到箭桿，大概去到箭桿邊而唔會突出箭桿外，以免增加產生clearance問題的機會。

金屬棍仔太出要較番入啲 / 太長要剪走

無辦法調較嘅膠箭托 / 簡單版金屬箭托需要剪走多餘部份，但如果未開始使用響片，將膠箭托鉤位保留會比較好，減低箭跌出箭托外的機會。

其它注意事項

膠箭托好大部份都係老翻蘋果牌super rest，而A貨當中一大部份使用嘅物料根本唔夠力承托箭桿，即使搭箭時無用手亂撳箭，無任何clearance問題，正常使用都好快打柴，所以揀膠箭托並唔單只係形狀ok就ok，質素都好重要，但單從外觀並無辦法分辨出好壞。

膠箭托快殘，比較少機會會唔夠膠紙用。而跟箭托有兩塊雙面膠紙一厚一薄，一般非木弓弓窗較闊都係需要選用厚貼，因為托箭個鉤並唔係太出，如果用薄膠紙就唔能夠有較承托箭桿。

而喺選擇器材2一文入面都有提及過，super rest於箭側墊窿位隔離有個突出膠部份，充當箭側墊功能之用，既然已經有用箭側墊，就應該剪走嗰部份，減低clearance 問題。

鉤位可能剪走；側邊突出位置要剪走

金屬箭托最需要留意嘅係金屬條是否堅固，大部份便宜貨都有虛位，令金屬條不穩定會上下左右搖動，不一致不穩定的出箭位置結果令箭射不準。跟膠箭托一樣，如果金屬箭托棍仔唔能夠調較出入位置，就有需要按箭桿位置用剪鉗剪短，比較麻煩。

一般金屬箭托比較耐用，可能直到換弓時都未需要更換，但膠紙未必有備用，部份牌子係有得散賣雙面膠紙，當然價錢比較貴。如果自己用其他雙面膠紙，可以考慮灰色海綿底3M雙面膠紙，因為最穩固，但由於係海錦底，會比較原裝貼紙厚而且令箭托可以輕微轉動。另外換膠紙時需要留意中間開窿開得靚唔靚會否阻礙箭側墊運作，同埋會唔會黐住金屬棍仔個磁石位，阻礙金屬棍仔回彈。

睇到呢度可能會發現，我完全無提過有一大舊嘢喺弓身後面，甚至乎包住個弓身嗰類型箭托，我完全唔建議揀呢類型箭托用，佢哋有三個問題：太大舊、肥同埋厊厏。結果係會令到把弓多咗無必要嘅重量，金屬棍仔勁粗勁大條亦都增加出現clearance問題嘅機會，同時如果放箭時把弓黐手或者任何情況總之把弓唔直跳出去 ，於弓身後面突出嘅位置好容易𠝹爆手。

好大舊包住個弓身嘅箭托（JVD網站圖片）

呢類型箭托好多都唔係用黐膠紙而係包住弓身要用鏍絲鎖緊到箭側墊窿上，正路就無乜所謂，因為通常弓身都有兩個箭側墊窿，而你亦都唔會同時上兩粒箭側墊，但係有少量弓身設計只有一個箭側墊窿，又或者好似蘋果弓咁自己已經要用番一格黎上塊箭托板，咁就直情無鏍絲窿可以用得到呢類型箭托。

箭側墊能唔能夠配合使用都係一個問題，因為包住弓身嘅箭托有一定厚度，隔住個箭托時箭側墊未必夠長度裝上弓身，需要另外買parts換，或者即使上得落，都會令到箭側墊可調較嘅幅度窄咗好多。最後要考慮嘅問題係存放，佢突出黎嘅位係好大可能𠝹爆個弓身袋、弓袋或者弓箱塊海綿墊。

係咁腐皮呢類型箭托，都需補番句，佢係有佢存在嘅價值，因為用黎射裸弓或者用超級重箭時係遠比其他類型箭托好用，只係射反曲弓定靶真係諗唔到任何原因應該要揀佢。