貝星人呢期睇啲乜？2023 — 11

《Moving 異能》、新《蜘蛛俠》系列三部曲、《進擊的巨人S1–2》、《王冠 S6 — Part 1》、《戀戀邪焰：揭穿秘教真愛陷阱》、港版《社內相親》

以為今個月無乜時間煲劇睇戲，但到寫文時又發覺都睇咗唔少，無他，宅在家睇電視係我喺英國新生活中最廉價又最大娛樂，慳錢活動嚟！

今個月睇咗嘅電視劇 / 電影 / 動畫有:

1.《Moving 異能》

2. 新《蜘蛛俠》系列三部曲

3. 《進擊的巨人S1–2》

4. 《王冠 S6 — Part 1》

5. 《戀戀邪焰：揭穿秘教真愛陷阱》

6. 港版《社內相親》

《Moving 異能》

第一次睇 Disney+，就係為咗韓劇 《Moving 異能》，實在太多人睇完讚好，於是我入坑。

故事講述喺地球之上、凡人之中，有好多擁有特異功能嘅奇人異士臥虎藏龍，有啲可以飛天，有啲力大無窮，有啲五感極之敏感，有啲可以發電，有啲可以有透視眼……咩款式都有。

有別於英雄片，佢哋無因為自己係「超人」而高人一等，反而佢哋只係俾國家秘密組織招攬為國效力嘅特種部隊，正所謂「能力越大，責任越大」，佢哋涉足唔少國家機密行動，甚至參與戰爭。本來應該係好威威？但係政治嘅嘢從來黑暗，知道得越多就越危險，「老闆」南韓政府又驚你洩密，對家北韓政府亦想殺之而後快，而且唔單只想滅口，連呢班特種部隊嘅仔女「超二代」都想殺埋，總之你有超能力，就殺無赦！

故事就係咁樣圍繞兩代異能人士點樣由隱姓埋名生活，到逐漸被迫至不得重出江湖，而每一集就逐啲揭開唔同異能人物嘅過去，每個人、每個家庭都有自己不為人知嘅故事。

改編漫畫，劇本故事幾新鮮，尤其個設定係有超能力嘅異能人要偷偷摸摸生活，甚至要不斷搬屋避開追捕等等，猶如過街老鼠，只不過佢係一隻好勁嘅老鼠咁解，但追殺佢哋嘅人一樣係異能人，高手異能過招，集集都你死我活。但「超二代」兩個扮演高中生嘅男女主角(李正河、高允貞飾)玩少年青澀愛情故事幾有趣輕鬆，係全劇嘅開心休息位。

演員陣容係勁嘅！除咗「整容典範」高允貞，仲有上一代女神韓孝周 (但呢套劇佢拋開靚女形象，戴住副眼鏡演高中生阿媽)，加埋趙寅成、車太鉉、柳承龍、柳承範，陣容超頂盛，要顏值有顏值，要演技有演技，睇演員鬥戲都值。

全劇緊張位同輕鬆位比例幾好，有時好緊張好有追看性，中間又滲下啲輕鬆二代愛情故事，唯一係中間集數因為要交代每個異能人嘅過去，睇睇下會好似忘記咗兩個「超二代」咁。

好值得推介嘅又一套漫畫改編韓劇！

新《蜘蛛俠》系列三部曲

新《蜘蛛俠》系列三部曲，三齣電影分別係 2017 年嘅《蜘蛛俠: 強勢回歸》(英文: Spider-Man: Homecoming)、2019 年嘅《蜘蛛俠: 決戰千里》(英文: Spider-Man: Far From Home)、2021 年嘅《蜘蛛俠: 不戰無歸》 (英文: Spider-Man: No Way Home)，由 Tom Holland 主演最新一代蜘蛛俠。

我當然又係俾 Marvel 迷 G 安排下睇晒呢三部曲。

睇完佢問我，咁多套《蜘蛛俠》之中，最鍾意邊套。Sorry，睇晒咁多套，最鍾意竟然原來仲係 2002 年由 Tobey Maguire 飾演蜘蛛俠嗰套。無他，故事好完整，講一個平凡學生變成蜘蛛俠嘅奇特經歷，又有 uncle Ben 被殺嘅煽情位，令蜘蛛俠蛻變成真英雄，又有唔靚嘅女主角愛情線，會戥蜘蛛俠緊張點樣唔洩露真身又媾到女，基本電影娛樂要素有齊。

反觀新《蜘蛛俠》三部曲，Tom Holland 或者年齡同演繹上最接近漫畫原著嘅蜘蛛俠，但就係因為咁有啲煩膠，完全明白點解 Doctor Strange 見到佢就話「所以點解我唔生細路」，因為真係好 Q 煩。但講外形講演技，我最鍾意其實係 Tom Holland！而同 MJ 嘅愛情線，sorry again ，呢個 MJ 角色簡直可有可無，無諗佢哋點第一次拖手加咀嘴，我都毫無感覺，成套戲只係為咗要有 MJ 而加個女主角落去。而第 3 集有三代蜘蛛俠同場，加埋過去其他出現過啲舊角色係有趣嘅，但大前提係你要睇過晒之前咁多套《蜘蛛俠》加《Advengers: Endgame》等等 6、7 套戲先會有多啲感覺……又，點解會無 James Franco!? 無嘅，如果知佢近期咩樣，就明晒點解。

作為 Marvel 迷嘅人就一早睇晒呢個《蜘蛛俠》三部曲，有睇開 Marvel 但唔算好迷嘅 (如我) 都可以睇下嘅，但係咪好好睇？我覺得只係普通、中上。

講返 Tom Holland，唔知有幾多人睇過佢仲係童星時演出嘅《海嘯奇蹟》？當時佢已好好戲！

[embed]《海嘯奇蹟》｜你想做個怎樣的人？ 人類再壞也有人性光輝時medium.com

《進擊的巨人S1–2》

舊嘢，但係咁俾人叫我睇，猛話好好好好睇，死都要我睇，好啦好啦！英國生活最平嘅娛樂就係煲劇，睇囉！

故事講人類世界出現來歷不明嘅食人巨人，人類為咗自我保護同求生，唯有起三幅高牆圍封自己，所以佢哋嘅世界好細，無見過海洋，離開城牆基本上係死路一條咁。而為咗保衞皇室同奮戰巨人，就有三種唔同嘅兵團，經過嚴格訓練，身手不凡，對抗巨人，保家衛國。

一開第一季第一集，第一個感覺係: 畫功好靚！

劇情方面，由第一季睇到第二季完，緊張好睇，好懸疑，好多謎團未解，邊個係敵係友真係好難分。只係睇咗兩季，死嘅角色仲多過生嘅角色咁，唔少角色出場就係為咗死喺巨人手上，名同樣都未記得就拜拜。

極力推介我嘅朋友話好有追看性，仲話唔明點解我停到。我諗都係好簡單嘅道理：鹹魚青菜，各有所愛。對啲暴力殘忍嘅嘢，我係有啲抗拒，睇咗兩季覺得好灰，人類嘅壞、戰爭嘅殘酷，不論動畫定現實都一樣咁令人感慨，又覺得動畫中描述各種人性都好真，真得好醜陋。睇紀錄片就已經睇盡人類嘅壞，但連睇動畫都咁暗黑風，好似有啲沉重。

好睇嘅，我亦會睇晒四季，但中間我要搵其他嘢溝淡下先得。

《王冠 S6》

Season 6 分 Part 1 & 2，Part 1 喺 11 月 16 日首播，共 4 集，Part 2 就隔一個月喺 12 月 14 日播出，共 6 集。

咁就嚟到第六季，最終季，一開季第 1 集就係法國巴黎車禍現場，表明今季大主題：戴妃之死，而去到第 4 集完 Part 1 前就首尾呼應去返第 1 集車禍發生當晚。簡單嚟講，呢 4 集由 Diana 同 Dodi Fayed 嘅關係發展開始，到佢死後查理斯接佢遺體返英國為止。

呢 4 集，我同一個土生土長嘅鬼佬 G 一齊睇，佢最大嘅反應有兩個:

1. 成套嘢好「妖魔化」Dodi 老豆阿法耶茲。
2. 成套嘢好美化查理斯王儲 (當時未登基)，連個演員都揀得太靚仔。

呢兩個我都同意嘅，事實上睇《王冠》一直到第六季，我的確因為呢套劇對查理斯多咗同情心，出軌又好、小家又好、軟弱又好，呢啲都擺明係負面架喇，但從劇中你睇住佢呢個無得揀嘅人生，又會覺得佢其實都好無奈，換轉佢只係平凡人，或者成個人生唔會俾人咁負面嘅印象。

呢集對查理斯最深刻描繪係戴妃死後，佢喺殮房痛哭至泣不成聲一幕，而且佢仲動用英女王嘅皇室私人飛機，親自走去法國巴黎接返已故前妻嘅遺體返英國。呢幕令我有兩份感慨，第一係查理斯雖然唔係一個好老公，但可能係一個好前夫，至少一個已有第二春嘅男人會特登飛去另一個國家接前妻遺體並唔係常態，仲會咁傷心亦顯得佢都念故人﹔另一份感慨係，對於戴妃之死，成個皇室俾咩反應都有好多政治考慮，邊個去巴黎、用咩機去拉、國葬定私人葬禮、英女王點表態等等，全部都要考量對皇室形象有咩正負面影響。

呢 4 集劇情，我自己覺得拍得麻麻地，有別於頭三、四季，呢幾集好似好刻意避重就輕，樣樣嘢都只係蜻蜓點水，點到即止，作為觀眾我唔太投入，亦無乜被牽動情緒。

但如果有睇過同樣以戴妃之死做主題嘅電影《英女皇》(英: The Queen)，就發覺不論選角、劇本都出色到肉好多，更深層次同更立體咁交代到英女王對戴妃之死嘅內心掙扎，佢同貝理雅之間喺戴妃死後 7 日由似是對立變成合作去守護國家嘅變化幾觸動人心，而用整整 4 集去交代差不多劇情嘅《王冠》明顯無咁好睇。

而車禍後，Diana 同 Dodi 都以鬼魂 / 親人太過思念而想像出嚟嘅形象再現熒幕同查理斯及阿法耶茲對話，呢兩幕又有點太戲劇性，明明係跟史實去寫嘅劇本，加咗咁多想像元素，有少少不倫不類。

麻麻地，但都會等 12 月中出埋 Part 2 睇埋去。

《戀戀邪焰：揭穿秘教真愛陷阱》

又一邪教紀錄片，呢個邪教係賣愛情，賣俾啲情場失意、心靈空虛嘅求愛人士。

先講結論：所有邪教教主都正 PK，我希望世界真係有報應，小心地滑！

整套共 3 集嘅紀錄片，論內容同編排，唔算引人入勝，不過睇到癲佬同傻婆呢對兩公婆點做神棍去呃人錢，令一啲心靈空虛、想尋求真愛嘅人不斷課金買佢哋嘅課程，佢哋後尾為咗呃多啲錢兼逃稅，索性將自己個組織變成教會，個癲佬仲要留長頭髮留埋鬚扮耶穌！癲還癲，呢個邪教依然存在，依然仲有人跟呢對神棍學點搵真愛。

唉……

佢哋嘅立論係世上有一個人會係你嘅「雙生火焰」(Twin Flame)，簡單嚟講就係「真命天子」，而且全世界只得一個，又只有佢兩個知道邊個係你嘅「雙生火焰」，而無論你用咩方法，都應該要追求到自己嘅幸福為止，不論係電話 message 攻勢，抑惑跟蹤心儀對象，甚至改變性向性別……而且佢哋仲會幫你決定埋性向，話你係 divine masculine or divine femaline，甚至有學員做埋變性手術。

跟佢學搵真愛，佢會教你之餘，仲會屈你、鬧你、侮辱你，又會灌輸埋啲錯誤性觀念，睇住佢喺鏡頭面前示範咩叫男人講嘢、女人收聲，仲有如果你個命中之男人要有 sex，你日日都要配合……

好多時睇呢類紀錄片都會令人問點解會有人信、點解會有人咁都俾人呃到，但其實好多時啲 PK 就係睇中啲人喺人生低潮、心靈軟弱時落手，與其責難受害人，其實更應該譴責加害者，可惜係唔少呢啲邪教教主，到最尾都仲係逍遙法外。

呢套紀錄片其中一個受訪者佢曾經係教主個 CEO，幫手荼毒其他信眾，但佢一日開始頭腦清醒返後，就驚覺自己竟然會信埋啲咁嘅神棍，仲要幫佢加害其他人，佢都講到聲淚俱下，相信佢內心份內疚會跟佢一世，可惜係不論係佢定其他醒返嘅受害人都浪費咗好多年人生喺呢個邪教度，但更可憐係好多人都仲未醒，繼續係咁俾錢呢對神棍嘆世界！希望呢套片推出可以令更多人清醒。

呢個邪教賣愛情，上次睇過一套係賣高潮: 《以高潮之名：One Taste 的故事》，有興趣可以睇下﹕

[embed]貝星人呢期睇啲乜？2023–07 《蜘蛛俠：縱橫宇宙》、《以高潮之名：One Taste 的故事》、《Costco: Is It Really Worth It?》、《阿諾舒華辛力加：人生三部曲》、《情場深偽術》、《尋找絕配情人》、《Michael…medium.com

[embed]呢輪又睇咗啲乜 Netflix 紀錄片 《乖乖聽話，邪教裡的禱告與服從》/ 《FYRE：國王的豪華音樂節》/《全面失控，1999 胡士托音樂節》/ 《地球圓不圓》/《照片中的女孩》medium.com

[embed]《以神之名》韓國大癲洗腦邪教 Netflix 犯罪紀錄片medium.com

港版《社內相親》

港版

韓版

翻拍韓劇，跟得好足，角色名、造型、劇本、衣着、髮型，甚至係辦公室、屋企等等實境，都同韓劇原作相近到極高，但可惜係同韓版一比，吸引力依然大減。

選角已用咗 Mirror 入面嘅 Anson Lo 同 Edan 做男一男二，已叫當紅炸子雞啦！Anson Lo 唔係唔啱呢個角色，佢嘅脂粉味拍得住韓版男主角，可惜係有比較有傷害，顏值真心輸一大截，演技亦唔見得十分好，搵佢擔正真係被比下去，吸引力大減 (教徒除外吧)。Edan 不過不失，但睇咗 4 集，佢個角色又無乜好發揮，唔似喺《大叔的愛》咁做阿田玩大滑稽咁搶眼，呢套要佢演極平實嘅 CEO 助手，埋沒咗佢嘅搞笑天分，但外型上佢都不輸韓版男二，不過依然係韓仔靚仔啲。

女一陳漢娜比較可取係佢妝前妝後真係兩個人，只但係佢嘅演技並無將呢個角色演得好，做孫賀莉時沉悶有餘，做孫美玲時狂野不足，完全不討喜，佢同 Anson Lo 夾埋呢對 CP 值甚低，無乜火花可言，相比韓版女主角嘅演出，又係明顯被比下去。女二 Shirley 沈不過不失，演呢個角色係可以，但一樣感受唔到佢同 Edan 之間嘅火花，兩對 CP 都有啲格格不入。

至於加咗旁白同漫畫效果幫唔幫到？幫唔到，有啲畫蛇添足嘅感覺，令人出戲。

我估睇多幾集都係咁上下的話，我可以棄劇了。

[embed]ViuTV 《大叔的愛》選角有驚喜 港版選角輸顏值贏親切感同喜感medium.com

呢個月值得推介嘅只有《Moving 異能》，其他都偏向失望多。《進擊的巨人》好睇嘅，只係對我嚟講有啲沉重，唔算好啱我口味。

[embed]貝星人呢期睇啲乜？2023–10 《走進你的時間》、《碧咸傳》、《尼馬﹕完美亂局》、《球王比利：巴西足球傳奇》、《性/生活 S2》、《Big Mouth》、《聖鬥士星矢﹕黃道十二宮戰士》medium.com

[embed]貝星人呢期睇啲乜？2023–09 《性愛自修室 S4》、《逃出魔幻紀：叢林挑機》、《逃出魔幻紀：霸氣升呢》、《男兒當入樽 The First Slam Dunk》、《傑佛瑞艾普斯坦：上流濁水》、《葛蘭·麥斯威爾：上流濁水》、《Harley &…medium.com

埋嚟睇，埋嚟揀！CLAP多 49下！

多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！

[embed]Medium 改制後收入影響 當然係不科學又不數學的分析medium.com

以下目錄係介紹呢期最新文章同推介其他舊文，歡迎嚟慢慢坐、慢慢睇。

[embed]Hey！呢度究竟有乜好睇？ B’s おすすめ｜自己點下自己燈bessieying.medium.com

[embed]「助養」貝星人 「救救小貝星人」助養計劃，每月飲少杯咖啡，支持我繼續寫寫寫。liker.land

[embed]