⭔天公伯仔炤光的鹹糜

有聲唸讀

便若坐火車到台南車頭，一下行出去，我上煩惱的是：

毋知欲食啥咧？

讀者恁定著會起憢疑：「府城上出名的是點心，呔會毋知欲食啥？敢是好料的傷濟，毋知欲揀啥物食？」

啊恁都毋知，府城的點心擔結市的有幾號位，比如國華街舊名石舂臼彼搭，保安宮彼箍圍仔，東門圓環彼跡⋯⋯咱台灣的城市一般tik是車頭的前站較交易，好食物嘛較濟。

猶毋過，台南車頭的四箍輾轉，點心擔較無遐濟，佇府城閣排無著等咧。

這就予我真大頭囉，閣兩點鐘就欲去成大演講，時間短短，我干焦雙跤通步輦，行袂遠。

來府城就是愛食好料的，無食著毋甘願，會厭氣！

去查我google地圖家己有插旗仔的標示，台南公園的西南角，有一間意麵濟濟人紹介，無就行對遐去⋯⋯閣過有一間牛肉湯，看中晝愛排隊無？閣較過，浮出「阿憨鹹粥」四个字 ——佇王浩一《漫食府城》內底，和阿堂鹹粥是府城虱目魚糜的東西軍代表。

掠做和阿堂仝款，猶未到中晝就歇睏矣 ，是講今仔日拜一，凡勢有機會，就開跤對燒閣鮮的鹹糜遐去。我無行大條路，是自鄭成功銅雕的圓環邊仔的巷仔軁入去（軁巷仔痟人是也），時間隨恬靜起來，毋知是按怎鼻著一款味，彼就是謝銘祐〈老城門〉唱的「有肉燥芳的風」，在地居民騎機車對我腹肚邊掠過，看伊對巷仔底的廟寺去，略略仔斡一下就無看人影矣。

巷仔口拄著安雨閘枋的枋仔厝，長條形的掛柴窗，看起輕可輕可。猶是現代的樓仔厝較濟，有大樓有公寓，透天的真趣味，柱仔會彎媠氣的形，窗仔門誠有變化，上蓋趣味的是鐵窗仔，會拗做格仔、花蕊、天星，閣有山的形，我一下看就掠著，彼予人看著一秒到日本的富士山鐵窗。

咱攏知，來府城軁巷仔是內行人的𨑨迌，欲直腸直肚有較僫，攏是彎彎曲曲較短節，有時若像是無尾巷，煞開一个縫通入去，三踅四探拄著一面磚仔壁，一間廟一擔油湯咧等你。

鹹糜就佇遐等我啊，有開！我踏入去頭家隨問人客欲食啥？

我早就想好：虱目魚膁肚，有粒的，掛油食粿，煙腸切一份。

鐵厝搭的店面闊閣躘懸，位濟濟毋知欲揀佗坐，中晝時仔，日頭光迵過天窗落凡間佇桌仔面開一塊長㧣形的光，這就是我欲愛的，袂輸攝影棚咧炤光，這是上好的天然光。我共彼碗膁肚浮糜、油食粿架咧的好食物，囥踮光內， 捎手機仔來翕，天公伯仔為我來炤光，加添這碗糜的好滋味。

我一手用湯匙仔khat糜內底的生蚵仔，那切寡膁肚做伙食，一手拈油食粿搵泔來咬，一時仔雙手全好料，喙內仝時有魚鮮和米芳，閣有油食粿的蔥脆酥糋。虱目仔肉做的煙腸較欲遐油，是帶酸lam仔氣的焦鬆，上特別的，是桌面的光陪伴。

這間本底佇石精臼，徙來忠義路現此時遮。納錢時，我開喙問頭家「阿憨」台語按怎講？

A-gām，阿儑。

啥貨？我掠做是人無巧的戇（gōng），嘛毋是人無精光的悾（khong）。儑（gām）嘛是講人無巧，戇戇土直做代誌。

就是按呢無咧插別人按怎講，袂去軁鑽嘛袂烏白來，就是認真照家己的手路，煮厚工的豐派予人客食，這毋是悾、毋是戇，是一款堅持和拍拚，我自車頭行來的跤力和汗流，毋但補起來矣，閣真會和咧。儑儑來食一碗糜，儑儑自車頭行來遮，一點仔都袂厭氣，是滿足掛飽氣。

2024.10.08.