Dastaq — Urdu Afsana

Parveen k mian, Arshad, ki wafat ko abb teen saal beet chukay thay. Ulaad thi nahi, bhabiyon se banti nahi thi aur saas nay bichari ko mian ki wafat ka ilzaam de ker uss se sub natay khatam ker diyai thay. Bichari Sultanpark k aik chotay se makan mein akeli rehti thi. Bhai kabhi ghairat kha ker kuch paise bhej daitay thay warna Arshad ki sarkari nokri ki waja se milne wali thori si pension se bhi ghar acha hi chal jata tha. Kuch kerne ko hota nahi tha tou pura din Quran aur Kitabon mein gum rehti thi. Sehat berkarar thi tou roz ki dou roti aur chai pani par zindigi achi guzar rahi thi. Bus kabhi kabhi akelay honay k gham mein thoray anso gira laiti thi.

Asar ka waqt tha, Parveen nay abhi abhi namaaz parhi thi. Chai peenay ka dil tha tou chulay par pani charha diya. Thora pani ziyada rakh diya tha tou khudko kosnay lagi. Abhi khudko dou lafz bolay hi thay k achanak ghar k darwazay par aik dastak hoye. Kaan thoray kamzor thay tou Parveen ko laga shaid uska waham hoga. Bhala uss bichari se kon milne ai ga, Eid tou thi nahi k koe rishtedar a jatay tou thori dair roki, socha, aur phirse kaam mein wapis lag gaye. Itne mein dobara se dastaq hoye. Parveen thori paraishan ho gaye k bhala iss waqt kon ai ga. Na uski mohalay walon se banti thi aur na uske rishtedar usse itna pasand kerte thay. Usse laga ya tou koe kuch mangnay ayya hoga ya phir wohi puranay survey kerne walay honge.

Hairat mein thi k jo bhi ayya hai bohat piyar se dastak daita hai, warna jo bhi uske darwazay par atta tha darwazay ko itna zor se bajata tha k kafi baar tou darwaza bus girtay girtay hi bacha. Parveen nay chohlay ki agg kam ki, apni chadar ori aur darwazay ki terf chal pari. Ghar chota hi tha aur kitchen se darwaza kuch kadam hi dur tha. Darwazay k kareeb ponchi tou teesri dastaq hoye, Parveen nay jaldi mein darwazay ki kundi kholi aur darwazay ki khirki kholtay hi hairan ho gaye.

Phlay thora gabra gaye, phir muskuraye, phir socha salaam keray par phir shaid narazgi mein mor gaye. Darwazay k uss par Parveen ka chota bhai Asghar khara tha. Usne safaid kurta pehna tha aur uske chehray par sharmindigi aur muskurahat dono thi. Bari behan k mortay hi Asghar nay fauran Salaam kiya.

Parveen teen bhaiyon ki subse bari behan thi. Bhai acha khasa kama laitay thay. Parveen k sunay mein ayya tha k unhon nay koe karobaar bhi shuru kiya tha aur abb tou shaid subke pass apni apni motorcar bhi thi. Bari hairan thi k najanay itni masroof zindigi mein uske bhai ko uski yadd achanak kaise a gaye. Parveen nay apne khiyalon ko samaita aur salam ka jawab de diya. Wapis mor ker aik baar phir se bhai ki shakal dekhi aur usse ankhon k isharay se ghar k andr bola liya. Parveen nay darwaza band kerne se phlay ghar k bahir jhanka k kahin koe aur tou nahi ayya. Gali mein koe nahi tha, mayusi mein darwaza band kiya aur Asghar se pocha, “Ajj behan ki yadd a gaye? Biwi se larr k ai ho kya?” Asghar besharmo ki terhan muskuraya, “Bus baji, zindigi najanay kahan le gaye, apno se paraya ker diya hai”. “Apno nay paraya kiya hai ya tumhari biwi nay?”, Parveen nay Asghar ko bethnay ka ishara kertay howay kaha. Asghar k pass iss baat ka koe jawab na tha tou chup ker k charpaye par betha aur zameen ki terf dekhne laga.

Parveen k ghar mein aik hi kamra tha. Uss kamre mein dou charpayan thi, aik par Asghar betha tha aur aik par Parveen. Dono khamosh thay aur bus kamre mein chohlay par bannay wali chai ki hi awaaz hi sunaye deti thi. “Paraishan ho kya?”, Parveen nay bhai k chehray ki hawaiyan dekhte howay kaha. “Paraishan? Ji shaid bohat sharminda hun apni ghaltiyon par”, Asghar nay apni behan se ankhain milatay howay kaha, “Baji yadd hai abhi kal ki baat lagti hai, mein bacha tou tha, app mujhai kapre badwalaya kerti thi, aur jab Abu atay thay tou app mujhai unse nimko k liyai paise mangne ka bolti thi”. Asghar thori dair ruka, muskuraya aur phirse bolne laga, “kaise baray ho gaye hum? Kaise bhol gaye woh sub purani bataien? Abu aur Ammi kya sochte honge? Bohat ghalat kiya hai baji… bohat”, Asghar ki ankhon se anso girnay lagay. Parveen paraishan thi, na janay uske bhai ko achanak se kya ho gia tha. Parveen nay tou hamaisha sub dil mein rakha tha, kabhi koe gila bhi nahi kiya tha. Parveen ko laga shaid chota hai, kisi se laraye ho gaye hogi, shaid baray bhaiyon nay kuch bol diya hoga. “Pagal ho kya? Ro kyun rahay ho? Mujhse nahi dekha jaye ga aise… Larr k ai ho kya?” Parveen nay ghusay mein bola.

Asghar nay apni ankhain ponchi, Parveen nay Asghar ko sath rakhay pani k jug ki terf ishara kiya par asghar nay sir hila k inkar ker diya. Chai ban chuki thi, Parveen nay aik cup mein chai daali aur Asghar k sath pari maiz par rakh di. Kuch lamhay aise hi khamoshi mein guzray, phir Asghar nay aik lambi sans li aur behan ki terf dekha, “App Ammi ki jaga hein, Mein ghallat tha mujhai maaf ker dein”. Asghar ki ghamgheen lehjay ko sun k Parveen ka dil bhi bhar ayya. Ankhain nam hoye par himat wali aurat thi khudko ronay se roka, “Asghar agr tum maafi mangte ho tou tumhain maaf kerti hun par mein shaid kabhi tumse naraz thi hi nahi. Bus zindigi aur kismet nay sath nahi diya. Meri duaien hamaisha tumharay sath rahi hein, mein nay kabhi ghussay mein bhi tumhain baddua nahi di. Han roye hun, akelay mein, tumhari yadd mein, kya keron insaan hon na, rona tou a hi jata hai”. Ispr Asghar ki ankhon se anso phirse phot paray, charpaye se khara howa aur zameen par beth gia, “Baji mujhai maaf ker dein, mein sharminda hun, mein kya moh dekhaon ga, baji mujhai maaf ker dou”, Asghar k chehra abb anson se gila ho chukka tha. Manzar dekha tou Parveen bhi khudko rok na saki, anso ankhon se nikalay aur galon se neechay utar hi ai.

Dono behan bhai uss khamoshi mein thori dair rotay rahay, narzain zameen par thi aur us chotay se kamre mein bus siskiyon ki awaaz ati rahi. Phir achanak se Asghar khara howa, “Zarori kaam hai baji, agr guzar sakta tou sari zindigi apke angan mein beth k guzar daita par mujhai chota smjh k maaf ker daina”. Ye bola aur behan ka jawab sunay beghair hi kamre se taizi se bahir nikal gia. Parveen nay ghar ka darwaza kholnay ki awaaz suni par woh band na howa. Paraishan thi, k ye najanay uske sath kya howa tha. Na janay kyun Asghar khudhi ayya aur khudi challa hi gia, Parveen ki smjh se bahir tha. Usse hairat bhi ho rahi thi, rona bhi a raha tha aur ghussa bhi charh raha tha. Ye bhala koe maafi mangne ka tareeka tha?

Parveen kamre k dosre terf paray garam chai k cup se nikaltay dhowaien ko khamoshi mein dekhti rahi. Bachpan ki yadain aur maa baap ki bataien usse ghamgeen kiyai ja rahay thi. Usne apne dard ko kam kerne k liyai ankhain band ker lein. Khamoshi aur andheray mein aik sakoon sa tha.

“Parveen tum ho?” Parveen nay ghabra k ankhain kholien, koe aurat thi. Aik anjaan aurat ko apne ghar k andr khara dekh ker Parveen ghusay mein boli “Behan app kon ho? Ghar k andr kaise ai?” “Mujhai maaf kerain, darwaza khula tha tou mein khud andr a gaye. Tum Parveen hi hein na?” Anjaan aurat nay dhemay lehjay mein kaha

“Han mein hi Parveen hun par app kon hein?” Parveen ghussa thi “ Mein tumharay bhai Nouman ki biwi ki dost hun. Isi Mohalay mein rehti hun. Tumhain aik kabar dainay ai hun”, Aurat nay kaha.

“Kya khabar? Khairiyat tou hai” Parveen phlay hi pareshan thi aur abb hairan bhi ho gaye. Aurat thora ruki par phir dar k boli,“Tumharay subse chotay bhai ki kal wafat ho gaye hai, ajj janaza tha apne miyan ko liyai wohi se a rahi hun. Kisi car accident mein wafat hoye hai.”

Parveen ye sun ker hairan hoye, phir hasi par na janay kyun uski ankhon se anso behna ruk na sakay.