港版《社內相親》，抄功課失敗作

有比較有傷害，抄功課失敗作

第一個星期睇，覺得唔好睇，諗緊棄唔棄劇，但又因為想聽廣東話港劇而用嚟每日送飯，於是今日睇到第 9 集，依然劣評。

雖然上星期寫《貝星人呢期睇啲乜》系列已輕輕劣評過，但基於我已好一段時間無睇港劇，一睇又睇咗套咁低質嘅，都想寫返篇後感。

（中咗「又要鬧又要睇」魔咒）

[embed]貝星人呢期睇啲乜？2023 — 11 《Moving 異能》、新《蜘蛛俠》系列三部曲、《進擊的巨人S1–2》、《王冠 S6 — Part 1》、《戀戀邪焰：揭穿秘教真愛陷阱》、港版《社內相親》medium.com

抄襲多過改編

劇本、劇情、造型、佈景都跟到韓版好足，我甚至有啲驚奇可以搵到咁多相似場景（我都唔知咁係彈定讚，哈），但可惜係感覺只係似抄功課抄得好足，但抄就係抄，無創意唔會抄得好，如果只係識抄，咁觀眾點解唔睇返韓版原著？要買個版權拍港版，咁有咩元素令呢套劇喺香港受歡迎？加咗漫畫同旁白並唔見得有咩吸引力，我只能話係抄功課抄得差之作。

韓版主角。

選角大失敗

當然，拍港版最大招徠就係由香港演員演出囉！仲要係香港最紅男團 Mirror 兩個紅星 Anson Lo、Edan 出演，佢哋上次翻拍日劇《大叔的愛》好評如潮，今次再「登神」合體出擊，無輸喇啩？我覺得今次真係輸在選角。

陳漢娜最令人出戲

連髮型都抄足都無用，韓版不論男一定女一嘅顏值同演技都贏港版幾條街，女一陳漢娜尤其令我出戲，佢講對白有一種好獨特嘅語氣同節奏，但呢個獨特之處令我好覺得佢係刻意唸對白，無乜感情，好生硬，令佢演可愛時唔可愛，演可憐時都唔可憐。而佢同 Anson Lo 呢對情侶檔外形同氣場都完全唔夾，連接吻戲都打動唔到我呢個觀眾，我只覺尷尬而 feel 唔到有愛情嘅甜。女一嘅平凡外表同生硬嘅演出，唔能夠說服我佢可以釣到食品集團 CEO 呢條大魚，真係想問憑啲乜？當然，我好知愛情係盲嘅，但觀眾眼睛係雪亮㗎！

Anson Lo 比韓仔比下去

至於 Anson Lo，我真心覺得我睇咗韓版而將佢大大地比下去。韓版男一演技唔算特別好，但高度同顏值都明顯勝一籌，要以萬人迷姿態出場唔會太令觀眾反感，但 Anson Lo 平時都應該唔係 sell 靚仔？（AK 靚仔啲喎）要佢 chok 爆出場加係咁瘋狂自戀讚自己幾咁人才出眾，真係說服唔到未盲又未有老花嘅我，好尷尬。佢演得唔係差，但真心有比較就有傷害，韓仔在前呀⋯⋯唔係厚厚嘅脂粉味就可以提升顏值同霸氣。

浪費咗 Edan

Edan 同 Shirley Shun 呢對男二女二嘅愛情線雖然都係平平，但都好睇過男一女一，主要係佢哋演得比較自然親和之餘，角色本身無咁離譜嘅主角光芒，相對平實，但叫機智醒爬又充滿喜感嘅 Edan 演咁平凡老實嘅男二真係好浪費佢嘅喜劇細胞。至於熱吻床戲，攝影師加個 filter 真係好重，浪費咗 Edan 操到咁大嘅胸肌。

配角反而最好

有一個角色係蔡宛珊演女二「陳映書」嘅表姐，韓版入面呢個角色都係討厭㗎喇，又肥又矮又誇張，滿口英文扮晒嘢咁，但港版蔡宛珊都 39 歲喇，要佢咁樣扮低能扮 cute 去做呢個角色，即係演丑角但醜化咗嘅係佢本人，我戥佢慘。

反而 ViuTV 「一姐」Hailey、麥沛東、Yoyo 三個演女主角嘅同事雖然係做陪襯品，但佢哋呢三個係選角最好又演得最自然嘅！（題外話，演出《正義迴廊》獲得極高評價嘅麥東瘦咗，我認唔到！但演技依然出色。）而做女一父母嘅 Ben sir 同盧覓雪都演得唔錯，所有配角選角都比主角好。

對白橋段唔啱廣東話

韓劇講韓文，唔識韓文就睇字幕，識嘅亦一般都知人哋文化係點，但好多橋段同對白直搬去港版度，用廣東話講韓式對白好難頂。其實香港地真係有人見到老闆喺人前人後都 CEO 前 CEO 後？真係會仲有父母安排相睇？真係仲會個 CEO 喺公司捉住個員工講我愛你同唔會咁易放棄呢啲說話？我覺得啲對白聽韓文睇字幕好地地，但夾硬塞落去用廣東話講真係有啲肉麻同突兀。我覺得抄功課還抄功課，既然要拍港版，係咪可以改動多少少迎合返香港本地文化？定香港而家已「陸化」咗唔再有真港式？又，女一陳漢娜個角色係咁加好多港式唔「潮」嘅「潮語」，如 「Sor 呀、撇 s」等等，係想突出女主角好草根？但配合陳漢娜無聲調嘅語氣，聽親都好礙耳。

簡單總結：

• 抄功課只想抄到好足，但無融入本地文化嘅調節，劇本唔啱香港地。
• 選角大失敗，特別係女一同男一（排名分先後）。

埋嚟睇，埋嚟揀！CLAP多 49下！

多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！

[embed]Medium 改制後收入影響 當然係不科學又不數學的分析medium.com

以下目錄係介紹呢期最新文章同推介其他舊文，歡迎嚟慢慢坐、慢慢睇。

[embed]Hey！呢度究竟有乜好睇？ B’s おすすめ｜自己點下自己燈bessieying.medium.com

[embed]「助養」貝星人 「救救小貝星人」助養計劃，每月飲少杯咖啡，支持我繼續寫寫寫。liker.land

[embed]