Tokyo2020 殘奧之旅 5

交通包括好多樣嘢，例如喺選手村裏面移動嘅方法或者係村往返比賽場地嘅交通。大會提供接駁巴士往返比賽場地，由於要載輪椅，每輛車座位相對要減少，有時未必有足夠位置。今次全部用大巴，每架大巴只可載6架輪椅，絕對不夠用，所以比賽中段賽會亦有提出希望能過凳的運動員上車後過凳，輪椅放行李箱，就可以多載幾個人。而輪椅上落需時，車站是否夠大供大量巴士同時上落客也會有很大影響，今次整體是安排得不錯的。如果大會安排班次未能配合比賽需要，自然是教練要安排好時間搭車或預早向團隊或賽會提出以作出調整。

平時亦會有一張卡畀運動員教練職員可以免費去搭市內公共交通工具，又或者運動員証本身就可以免費搭市內交通公具，但係今次因為疫情，我哋運動員教練困咗喺村，活動範圍只有選手村同埋比賽場地，咁呢就冇咗呢張交通卡啦。

無人駕駛嘅電動車

村裏面一定要提嘅交通就一定係無人駕駛嘅電動車，其實呢個名唔係好正確，因為每架車入面都有人mon住，只係自動導航。呢架電動車之前都宣傳得好勁，因為gimmic，但係好不幸地喺殘奧中途出咗一個意外，車撞到個視障運動員令到個運動員無辦法繼續參賽，令到呢架冇人駕駛嘅電動車停駛咗幾日。其實賽會應變得好快，喺冇無人駕駛電動車呢幾日裡面，即刻安排咗哥爾夫球車接載有需要嘅運動員。

先講返個意外，其實要平返吓，如果你有睇意外報導內文，會發現其實大部分報導都係標題黨，因為架車喺自動行駛嘅時候係無意外發生，意外係因為有人override咗個自動駕駛系統所以先撞到人。所以其實Toyota架車係完全冇問題，但係anyway最終Toyota都出咗嚟道歉，同埋即使最後選手村裏面有運行番呢啲車，但係全部變曬手動manual mode。呢件事其實係超低能，因為正正係畀人override auto mode出事，但係啲標題黨就不停講話係無人駕駛自動導航出事，咁最後就全部都變曬manual mode。

咁短距離都有路線圖

好彩一開頭已經試坐過架電動車，其實都係打卡為主，大部份坐過嘅村民都係話其實自己行或者轆輪椅絕對會快過搭車。架車太安全，行駕非常慢，村入面又多路口，不論有無人每次去到路口都要停好耐跟住先會繼續行駛。

共享單車

無人駕駛自動車電動車就係以打卡為主，但係選手村嘅size話大唔大話細唔細，都確實有需要有代步工具，如果齋行，村頭到村尾都要超過10分鐘。今次大會提供咗一啲共享單車，畀人隨便可以拎黎踩，開頭係有唔少車，但越後期就越少車，大部份應該已經畀人收埋自私用，都幾難搵到。另外亦都見到各隊伍有自己的車隊、有單車、有scooter、有已經超越電動輪椅level的電動車（完全唔知解可能運到上飛機，一黎好重、二黎舊差電）

村內人唔算好多，加上有一大條馬路單車可以行，即使有輪椅有單車，其實都好安全，冇見過話會撞到人有意外。

韓國隊的單車隊

最後，以下片段係由住宿大樓行去巴士站。多謝收看呢五篇殘奧介紹文，祝各位運動員教練能去到大型運動會親身體驗一吓。

[embed]