幾句廢話

講到明係廢話，係講我自己嘅廢文，睇完都唔會有營養，消化系統唔係太好嘅人可以㩒上一頁。

首先想講嘅係我唔想妄自菲薄，今時今日識寫字識拍片嘅通街都係，求其跌部冷氣機落黎都扎死一打KOL。我冇諗住做KOL，亦冇諗住要出名。比我勁嘅人大把，出名都唔輪得我呢條蛋散。

Medium呢個位我係用黎back up文，目前為止都係CUP嘅文。以前有係其他渠道寫過文，果堆就算數，我當黑歷史。以後可能會出文係其他地方，或者係medium獨立出（其實呢篇都係），但暫時冇特別計劃，主要都係將CUP嘅文搬過黎(間中會加筆或者增補)。我facebook冇page，亦冇blog，呢到係我惟一back up文嘅地方。是否長期經營就睇心情。係，呢個平台我係抱住無責任嘅心情做嘅。

必須聲明CUP寫文係有稿費，我出嘅文已經係收左錢，所以呢到放出黎嘅文，我唔會放paywell。所有人都可以睇，前提係你有興趣睇。離地咁講，你唔睇唔clap其實都唔會影響我收入。可能你會話，大把人將出過嘅文再放係Medium賺錢，其實冇咩問題。我的確可以咁做，但將原本可以免費睇嘅野，要人比錢睇，我過唔到自己果關。咁樣收人錢，生仔會冇屎忽，雖然右手並不會懷孕。

當初會係CUP出文有兩個原因。一係上年用Moyashi呢個名係連登出post行東海道，由東京行去京都，行完好似出左少少名。我知係錯覺黎，但因為咁有幾間出版社問我出書，書冇出到，但就變左係CUP寫專欄。二係我本人識CUP嘅編輯，所以佢直接搵我。對認真睇我文嘅人，我要道個歉，因為我當初係純粹抱住打工收錢嘅心態寫。

當初佢想我寫日本生活，但一星期兩篇，寫左一個月廢文已經乾塘。「海賊王」係Jump連載，一星期都係一話，我唔認為我嘅生活有精彩刺激過偉大航道。於是就變成我自己果排諗咩睇咩，就出乜野文。亦因為稿費係逐篇計，所以我concern數量多過質量。另外亦有CUP本身性質與版面限制，會出現明明係同一篇文又拆再幾篇出嘅情況。不過睇CUP嘅人唔係專登黎睇我，所以相信no one give a fuck。

內容方面佢地冇乜要求，關於日本就得。但因為我愈寫愈多歷史社會學術野，所以有時會用另外筆名當正稿出。我本人係東京讀postgrad，題材選擇好多時只因為我睇左邊本書or論文。為左維持起碼一星期交兩篇嘅原則，好多都係介乎廢文與隨筆嘅雜質。但我放係Medium唔收錢，稿費又有CUP比，大家將就下想睇就睇，隨心就得。

Ps, 唔好期待太多

Ps 2, 我research topic係九龍城寨，有咩特別睇法or資料，歡迎搵我，無酬

**MOYASHI 在日廢青異聞錄@CUP**

**汶山@CUP**