《派對咖孔明》 — 除咗感動，仲有感慨

《派對咖孔明》劇照

最近先開始追返 7月番《派對咖孔明》，無論係如何將古代人物寫入現代、各種古今素材應用、仲有角色每種內化、成長同心理投射，比我預期中更出色。每一次劇情嘅衝擊、果種莫名嘅感動基本上每一集都令我眼濕濕。

除咗感動，仲有感慨。

感概嘅係日本人將中國文化同傳統發揚光大，細加咀嚼而演化出嚟，尤其是對文化洪流時刻保持謙遜、自省並加以改進嘅心，呢樣嘢係喺今日嘅泛華人文化裡面所缺乏嘅。就好似香港今時今日電視台嘅所謂兩台之爭，創作都係如此不求上進，完全係「阿茂對阿壽」：某大台還好，起碼都會使用「社會話題性」去推動劇集。另一個台則拿住「創新」牌頭嘅台，所謂嘅創新，已經係鬥影視新星人氣嘅戰場。反之劇情內容則係舊酒新瓶，可謂毫無可取之處。

講返正題。所謂「追劇」，係必然有「可追性」，先令人有追嘅衝動。劇集情節要時刻令人有驚喜，才會不致於落入俗套。比如《派對咖孔明》就加入唔少有趣嘅情節，作為令劇情不致沉悶嘅順滑劑。

點樣將三國同現化連接，呢啲大路嘢就唔講，我講少少細節。比如：有一集孔明為咗招攬說唱歌手，答應會應承對方一個願望。當觀眾都期望被「收服」嘅歌手會講老掉牙深受感動不講條件之類，豈料對方順口講一下「我要一億」嚇到在場人士半死，然後解釋只係隨口講先順利打圓場。值得留意係當時孔明聽罷係一口應承，而當觀眾從頭幾集見識過孔明嘅「能力」（注意唔係從其他三國作品下嘅孔明），亦會順理成章認為「再世」孔明嘅承諾係有說服力嘅。

而另一個小細節則係故事利用三國演義「錦囊妙計」嘅情節，講述孔明留低三個錦囊俾佢要輔助嘅少女女主，而少女唔係好老土咁，按老劇情喺危難時咁逐個錦囊打開，而係一次過就打開晒。奇妙嘅係，錦囊依然係無聲無色地幫少女脫險，兼且情節上亦有提供小小註腳，輕輕一筆就說明孔明錦囊生效嘅合理性。

結論：所謂嘅「神」，唔係把口講佢係幾神就有幾神。呢種口傳耳說已經好低手。真正嘅「情節之神」，就係能夠將「神」舖排於情節之中，讓情節說話。神自在其中。

(如果聽到片尾首《気分上々↑↑》有共鳴嘅，應該都係有啲年紀嘅人士啦哈哈)