Tokyo2020 殘奧之旅 3

Main Dining Hall

食

第二樣就嚟到食物，最多人關心應該都係想知道村入面嘅飯堂有乜嘢好食。大型運動會通常會留返喺村裏面飯堂食嘢，如果賽程係會覆蓋上下晝有時都會喺場地入面食晏晝，不過都係賽會安排好供應嘅膳食，不過好多時都總會有機會出去遊覽喺街外面食嘢，今次當然除外，因為困咗喺村入邊無機會外出。如果自己出去食，萬一食錯嘢出事，就係自己負責，第一個可能係食錯嘢唔舒服，第二樣講緊係食咗一啲含禁藥成分嘅食物。呢啲情況喺單項運動比賽嘅時候發生機會比較多，因為大會供應食物好多時都會唔啱食、份量少、甚至乎無特定供應要食自己，好多時都會食非賽會供應食物。

體院同禁藥委員會都成日有提醒運動員其中一樣好易中招嘅就係豬肉精，某強國嘅肉類最有可能出問題，究竟要食幾多先會出事我哋冇辦法量度，但係我哋知道某強國自己運動隊伍嘅訓練場都係有特別指定嘅肉類供應商，再去番十年廿年前甚至乎傳說一啲集訓基地會自己養豬食，因為街買嘅一定唔安全。另一個會出事嘅係麵包上面嘅罌粟籽，呢個都係常見於食物但又係含禁藥成分嘅食材。

為咗保障運動員安全，飯堂通常會寫明食物只可以喺飯堂裏面享用，唔能夠帶出去外面，今次有一啲指定包裝食物係畀帶走，通常呢啲都會寫得好清楚，另外亦都有試過話入村嘅時候唔比帶任何食物，以防有問題。咁當然實際執行嘅時候有冇捉得好嚴就係另一件事，但係呢啲都係大型運動會賽會為咗保障運動員健康同食物安全嘅措施。

而喺飯堂入面會見到嘅係每一樣食物都會有詳盡嘅標籤標示菜式或者食品使用嘅食材同埋營養成分，以照顧唔同人對食物嘅不同需求，例如素食者嗰啲全素蛋奶素、過敏症者要食無麩質飲食或者唔能夠食海鮮、 宗教需要例如清真食物、甚至乎係一啲運動項目要計得好清楚食啲乜嘢，咁呢個對我哋射箭運動員黎講就無乜太大關係啦。

揀食物嘅時候，我哋鬼會睇食物標籤成份咩，淨係睇件食物個樣好唔好食賣相吸唔吸引。

今次選手村裏面有兩個飯堂，一個大型嘅主飯堂Main Dining Hall，有兩層可以容納人數好多，另一個叫Casual Dining Hall，細啲，主要係做啲一小碟一小碟嘢食，全部係日本嘅料理。整體嘢食並無想像中咁好食，可能原本對日本嘢食嘅期望太高，明明去旅行覺得求其撞入去便利店、百貨公司地庫好亂買嘢食都超好食，今次就冇乜呢啲驚喜嘅感覺。 可能殘奧人數真係比較少，今次完全無需要排隊嘅情況出現，只要唔係喺最Peak Hour嘅時間入去食嘢，基本上都好易拎嘢食同搵位。

[embed]嘢食唔差，但一定唔係最好，印像中印尼亞運Canteen仲正

[embed]真心好食啲，雖然佢冇乜變化餐餐都差唔多，但係我哋好似有一半嘅餐都係喺呢度食

睇完兩個飯堂，睇埋今次我個人覺得最有驚喜同覺得最失望嘅五樣嘢食。

[embed]因為淨係得相冇片，呢條片整咗我最耐，由零開始整真係大鑊好多，雖然已經唔係落好多effect。每樣嘢都有佢地專業，blogger都唔係咁易搵食

有無限咁多款醬汁，好多都唔知咩黎，我淨係想搵支豉油都搵咗勁耐

有兩樣嘢諗極都諗唔明，第一樣係點解嘢食會偏鹹，好多味餸都係比較正常鹹，麵豉湯可以自己溝一倍熱水落去都仲得，第二樣蔬菜亦都非常少。

Main Dining Hall嘅嘢食

好甜嘅甜品

全部熟嘅壽司

Casual Dining Hall嘅嘢食