《魷魚遊戲》S2 & S3 好狗血

有 Cate Blanchett 客串出鏡都救唔到

「見好就收」真係好有智慧嘅四粒字，如果《魷魚遊戲》識得見好就收，咁咪成為經典囉！而家呢？都仲係好經典嘅，但變咗係虎頭蛇尾，經典序幕，然後狗血爛尾作結。

（有雷！有雷！有雷！）

因為要數 S2 同 S3 點樣爛尾同狗血，所以必然有雷，讀者請注意（但我估想睇嘅好多都睇完？）

重新參賽好牽強

S1 最後男主已喺呢個殘酷嘅魷鯉遊戲入面贏咗，執返條命仔，得到巨額獎金，之後重出生天依然活喺陰霾之中我明，但 S2 走去重新參賽就真係唔明。都唔好話你置身其中做參賽者，我做觀眾都覺得呢個遊戲背後勢力強大，憑你一己之力可以推翻？仲要係用參賽者身分返去？咁同送死有咩分別？

大肚婆都嚟參賽？

個後生女大住個肚去參賽又為乜，走投無路都好，大住個肚，真係唔諗下去參加一個不知名嘅遊戲，唔知去邊、唔知有咩人、唔知做乜，真係夠膽咁樣攞住個 BB 嘅生命嚟冒險？又，咁啱得咁橋個 BB 老豆都係遊戲參加者，真係任時完都搞唔掂。

阿媽點會殺個仔？

阿婆同個四眼孝順者呢對母子組合係最唔合理，去到抽籤揀殺人定被殺嘅捉迷藏遊戲，明明阿媽係抽中殺人，最後個仔同佢調換身分？同推個媽去死有分別？個媽仲離譜，為咗救嗰個大肚婆（生咗其實唔叫太肚婆）同 BB，竟然一枝髮簪插落自己個仔度，無啦啦殺仔成仁？邊有可能呀？

北韓阿媽可有可無

脫北者老母呢個角色可有可無，睇完成個 S2 同 S3 都唔明有咩意思，呢兩季無咗佢都完全無問題，條故事線同其他劇情完全無交雜，我都戥佢瞞，自己做自己一套劇咁。而最後為咗救個陌生人而自己冒上生命危險？純粹因為對方有個有病嘅女引起佢嘅同情心兼同理心？嘩，佢入到去個 Game 係做劊子手殺人㗎喎，有無咁宅心仁厚？點講得通？仲要之後出返去要相見不相認，為乜？

死老鬼做和事佬

最後一個遊戲，一定係有啲內閧場面，一直都奸嘅死老鬼見啲隊友爭執竟然去勸交？呢個遊戲嘅精神係咩？係你死我亡吖嘛！見人哋鷸蚌相爭，梗係等住做漁人得利啦！最好佢哋起初口角、繼而動武，打死咁兩三個人，少咁啲人爭獎金更好，點會出手出口幫手叫停？編劇唔識代入諗下？

個警察做過啲乜？

網上有個「梗」，就係話如果你覺得自己一事無成，諗下《魷魚遊戲》入面個警察，搵阿哥搵咗三季，佢做咗啲乜呀？無呀！我一諗起佢，就自覺自己日子過得好充實好有意義。

S2、S3 令人失望

當《魷魚遊戲》S1 俾到觀眾咁大驚喜後，S2 同 S3 係令人絕對失望！S2 睇到最後未完要等 S3 已經極度欺騙觀眾，未拍好唔好播吖！咪播半季扮一季呀！S3 仲離譜，劇情狗血，勁唔合理，又無咩場口係令人睇得好爽或者要追住嚟睇，純粹真係睇開睇埋去了咗件心事就算，但絕對覺得自己浪費時間！（又係咁，睇完爛劇仲要打篇長文鬧，再浪費多啲時間！）

未睇唔好睇呀！睇咗 S1 都唔好開嚟睇呀！俾個美好回憶自己！

[embed]Hey！呢度究竟有乜好睇？ B’s おすすめ｜自己點下自己燈medium.com

誠邀訂閱成為貝星人 Patreon 免費 / 訂閱會員！

誠邀各文友喺 Patreon 支持貝星人，有「免費會員」同「訂閱會員」以供選擇，悉隨尊便。訂閱費只需港幣 $20 或英鎊 £2，十分相宜，請多多支持！

[embed]Get more from 貝星人 on Patreon 闢一塊心田，自個兒筆耕。嗜好太多，時間太少。想隨心所欲，亦隨波逐流。patreon.com