پاک بھارت تعلقات پر اقبال ملک کا تازہ ترین کالم

""خطے کا امن یا ووٹوں کی سیاست؟ پلوامہ حملے کے بعد کا منظرنامہ" جب سرحد پار سے جھوٹ گونجے

پاک بھارت تعلقات میں بھارت کا کردار ہمیشہ شرم ناک رہا ہے

کالم نگار: اقبال ملک

پلوامہ حملے کے بعد پاکستان اور بھارت کے تعلقات جس نہج پر پہنچ چکے ہیں، وہ نہ صرف اس خطے کے امن و امان کے لیے خطرہ بن چکے ہیں بلکہ عالمی طاقتوں کے لیے بھی لمحہ فکریہ ہیں۔ بھارت کی جانب سے ہر بار بغیر تحقیق، بغیر ثبوت کے، پاکستان پر الزام دھر دینا اب ایک روایت بن چکی ہے، جو نہ صرف غیر ذمہ دارانہ ہے بلکہ جنگی جنون کو بھی ہوا دیتی ہے۔ پلوامہ حملہ بھی اسی سلسلے کی ایک کڑی تھا، جسے بین الاقوامی تجزیہ کاروں نے بھی ایک "False Flag Operation" قرار دیا۔ کئی معتبر عالمی مصنفین اور صحافیوں نے اس بات کی نشان دہی کی کہ بھارتی حکومت نے انتخابات سے قبل ہمدردی اور ووٹ حاصل کرنے کے لیے ایک ایسا ڈرامہ رچایا جس میں اپنے ہی فوجی قربان کر دیے گئے۔

تاریخ گواہ ہے کہ بھارت نے ہمیشہ مذاکرات سے راہ فرار اختیار کی۔ جب بھی دونوں ممالک کے درمیان کسی بہتری کی امید پیدا ہوئی، بھارت نے کوئی نہ کوئی واقعہ گھڑ کر ماحول کو خراب کر دیا۔ چاہے وہ ممبئی حملے ہوں، یا اُڑی واقعہ، یا پھر پلوامہ۔ ہر بار بھارت نے تحقیقات سے پہلے میڈیا کے ذریعے پاکستان کو دنیا بھر میں بدنام کرنے کی کوشش کی۔ یہ ایک مستقل حکمت عملی ہے جس کے ذریعے وہ دنیا کی ہمدردی سمیٹنا چاہتا ہے جبکہ اپنے اندرونی مسائل، اقلیتوں کے خلاف ظلم، کسانوں کے احتجاج اور کشمیر کی صورت حال سے توجہ ہٹانا چاہتا ہے۔

بدقسمتی سے پاکستان کے اندر بھی کچھ عناصر ایسے ہیں جنہوں نے ہمیشہ بھارت نوازی کو فوقیت دی۔ خاص طور پر شریف خاندان کے ادوار میں یہ رجحان شدت سے دیکھنے میں آیا۔ نواز شریف کی دوستی مودی سے کسی سے ڈھکی چھپی نہیں۔ ان کے ذاتی کاروبار، جو بھارت میں چلتے رہے، ہمیشہ ان کی پالیسی پر اثر انداز ہوتے رہے۔ ان کے وزرائے اعظم بننے کے بعد بھی بھارت کے خلاف کوئی واضح موقف سامنے نہیں آیا۔ جب بھارت پاکستان پر حملہ آور بیانات دیتا رہا، تو شریف حکومت کی خاموشی مجرمانہ حد تک پہنچی رہی۔ یہی وجہ تھی کہ عوام میں شدید بے چینی پائی جاتی رہی کہ آخر ہمارے حکمران بھارتی مظالم پر لب کشائی کیوں نہیں کرتے؟

اس کے برعکس عمران خان نے جب اقتدار سنبھالا تو ایک نیا بیانیہ سامنے آیا۔ وہ بیانیہ جو بے باکی، جرات اور حق گوئی پر مبنی تھا۔ عمران خان نے نہ صرف بھارت کو ہر پلیٹ فارم پر بے نقاب کیا بلکہ عالمی برادری کو بھی باور کرایا کہ جنوبی ایشیا میں امن کی راہ میں سب سے بڑی رکاوٹ بھارت کا رویہ ہے۔ عمران خان کا دو ٹوک لہجہ، ان کا اعتماد اور ان کی پاکستان سے غیر مشروط محبت ہر محب وطن پاکستانی کے دل کو بھاتی ہے۔ انہوں نے پلوامہ حملے پر واضح الفاظ میں کہا تھا کہ اگر بھارت کے پاس کوئی ثبوت ہیں تو پیش کرے، پاکستان کارروائی کرے گا۔ لیکن محض الزام تراشی سے پاکستان کو جھکایا نہیں جا سکتا۔

یہ بات بھی روز روشن کی طرح عیاں ہے کہ بھارت نے ہمیشہ میڈیا کو ہتھیار کے طور پر استعمال کیا۔ ایک زہریلا پراپیگنڈا مشینری جو ہر معمولی واقعہ کو پاکستان کے خلاف استعمال کرتی ہے۔ چاہے وہ کسی بھارتی فوجی کی ہلاکت ہو، کسی ریلوے ٹریک پر دھماکہ ہو، یا کسی جھڑپ میں ایک سپاہی مارا جائے، فوراً پاکستان کا نام لے لیا جاتا ہے۔ سوال یہ ہے کہ کیا دنیا کی سب سے بڑی جمہوریت کہلانے والا ملک اتنا غیر ذمہ دار ہو سکتا ہے؟ بدقسمتی سے جواب ہاں میں ہے۔

پاکستان کو اب چاہیے کہ وہ اپنی خارجہ پالیسی کو مکمل طور پر ازسر نو مرتب کرے۔ بھارت کے ساتھ تعلقات کی بہتری کی خواہش اپنی جگہ، مگر خودداری اور قومی وقار مقدم ہونا چاہیے۔ ہمیں اب کسی قسم کی لچک یا نرمی دکھانے کی ضرورت نہیں۔ دنیا کو سچ بتانے کے لیے ہمیں مضبوط سفارت کاری، بااعتماد میڈیا اور بین الاقوامی فورمز پر متحرک نمائندگی کی ضرورت ہے۔ پاکستان کو ہر اس مقام پر جہاں بھارت جھوٹا پراپیگنڈا کرے، سچ اور ثبوت کے ساتھ جواب دینا چاہیے۔ اب وقت آ گیا ہے کہ ہم دنیا کو بتائیں کہ اصل دہشت گرد کون ہے، خطے کا امن بگاڑنے والا کون ہے، اور بار بار جنگی ماحول پیدا کرنے والا کون ہے۔

آخر میں یہی مشورہ دینا چاہوں گا کہ پاکستان کو اب واضح اور دو ٹوک موقف اپنانا ہو گا۔ ہمیں اپنی بات دنیا تک پہنچانی ہو گی، بغیر کسی خوف یا مصلحت کے۔ بھارت کے جھوٹ کا جواب سچ سے، ان کے پراپیگنڈے کا مقابلہ دلائل سے اور ان کی جارحیت کا جواب جرات مندی سے دینا ہو گا۔ یہی ایک آزاد اور خوددار قوم کی پہچان ہے، اور یہی آج پاکستان کی ضرورت ہے۔

پلوامہ_حملہ

FalseFlagOperation

بھارتی_پراپیگنڈا

ImranKhan

نواز_شریف

جنوبی_ایشیا_کا_امن

سچ_اور_جھوٹ

پاکستان_کا_موقف

IqbalMalikWrites

MediumUrdu

ZehnOZuban

پاکستان_سب_سے_پہلے

محب_وطن_کالم

FakeNewsIndia

IqbalMalikColumns