讀後感：宗教叢書

上回提到，我為咗惡補歷史，重睇《寫給年輕人的簡明世界史》。點知本書話，記載古代史寫得最豐富嗰本書叫《聖經》，「如果你現在好好讀一遍聖經 — — 也可以稍後一些時候再讀，你就會發現古代的事情幾乎沒有比聖經裡講得更多、更生動的。」我咁聽話，當然照做。為公平起見（？！），又順手睇多幾本其他宗教嘅。

《新兒童聖經 : 自世界創造到新天新地》（Children’s bible），林牧野、何美玲編譯，2006 文筆淺白易讀，但內容上（我估）算齊全。將細個散修修聽過嘅聖經故事，扣翻上時序框架，咁樣connect the dots係學習嘅樂趣呢～ 教徒朋友分享話，同小朋友講聖經故仔好難以啟齒。又係喎，即使兒童版減省咗例如所多瑪與蛾摩拉啲姦淫情節，但依然成本書都係意圖謀殺、謀殺、屠殺 — — 神殺嘅、神叫人殺嘅、人自己殺嘅…… 又不過，即使唔講咁遠古，只係短短百幾年前，人類平均活唔過三張嘢㗎！根據Our World in Data，1870年嘅全球人均壽命係29.7歲。咁幾千年前嘅古代人郁啲就死，應該符合史實亦好合理呀可？

《關於古蘭經的100個故事》，吳學榮，2011 同聖經好似，人物、事蹟都有好多重疊。不過譯名唔同，例如神創造嘅第一對男女唔係「亞當、夏娃」，係「阿丹、哈娃」；建方舟唔係「挪亞」，係「努哈」；分紅海唔係「摩西」，係「穆薩」。事蹟亦有細節上嘅出入，例如處女所生嘅「爾薩」帶住門徒遭猶太人追殺，但結果係一個身形相似嘅路人被點錯相而釘十架。 為咗在地化，本書引用唔少中文諺語、詩詞，例如「本是同根生，相煎何太急」、「魔高一尺，道高一丈」、「有奶便是娘」，睇住相異文化知識共處同一頁，感覺有啲……有趣。 追讀性嚟講，圖文並茂嘅兒童聖經好睇啲，除咗因為伊斯蘭教禁止畫宗教圖像而悶在起跑線，哩本亦比較重說教味，睇到後來幾乎每個故仔都係：我信，佢唔信，我祈禱，真神一出手佢哋成條村冚家剷，完～

《佛經故事一百篇／100 Buddhist parables》，張慶年，1996 封面話「漢英對照」，內頁原來係寫文言文嘅！都好彩係中英對照，起碼可以靠英文學文言文。每個故仔都係講無名蠢人做荒謬蠢事，明明心有所求但一意孤行用錯方法，於是得不償失或一無所得。

《What If I’m an Atheist?: A Teen’s Guide to Exploring a Life Without Religion》（如果我係無神論者，咁點算？），David Seidman，2015 話晒都係全球第三大信仰，又睇咗本講無神論嘅。美國人對無神論者嘅排斥、歧視、污名化，香港讀者簡直無法想像。畢竟我哋文化好唔同，根據Adherents，美國係最多基督徒嘅國家；而於2020年，無宗教/無神論者佔香港人口54.7%，以人口比例計係全球第五高。本書亦引用調查指，無神論者係最不受美國人歡迎嘅小眾，比起穆斯林、同志、新移民更甚；家長亦最唔希望仔女同無神論者結婚。估計容不下無神論新抱/女婿嘅應該更加唔會接受同性婚姻，咪即係寧願個仔娶個lesbian，或者個女嫁個gay佬，都唔想仔女同相愛嘅無神論者結婚！作者亦教年青讀者，向家人「出櫃」時儘量唔好提起 the “A” word（難聽過粗口嘅「無神論者」）。 儘管今日受盡白眼，本書結尾教美國年輕無神論者盼望，學者推測到2038年，無神論者將增長至超過全球人口一半。Welcome to the right side of history LOL!