Tokyo2020 殘奧之旅 4

住就其實就冇乜特別，間間房都差唔多，間隔上我哋個單位比較細，得兩間房，大嘅話好似可以去到五六個房。通常選手村起完出嚟運動會之後都係會當住宅賣樓，今次個地段好靚，位於東京晴海（Harumi），望到東京灣與彩虹大橋。房間裏面嘅間隔當然會改，所以今次見到好多都係類似紙做嘅牆壁，我估應該之後會拆曬佢再搞過。

用木鏍絲裝嵌嘅紙牆(?)

呢款水龍頭好好用，不過香港唔興

換氣口

紙板床架好堅固

床墊可以自行改變軟硬，不過見訓得幾好就無搞過佢

其中今次嘅床架係比較受關注，因為係用紙摺出嚟，未開始比賽之前已經有好多新聞，亦都有參加奧運嘅運動員，幾個人一齊跳上去特登跳爛張床嘅片放咗上網。

住宅同選手村嘅最大分別係，住宅好少會同一時間全幢樓嘅人要一齊搭𨋢，但係選手村就唔同，唔同項目比賽嘅時間都係一早開始，可能係近乎全幢樓所有人都喺差唔多嘅時間要落樓。而殘奥自然就比奧運更加大鑊，因為全幢樓可能超過一半係傷殘人士（呢期殘奧會開始咗宣傳活動口號WeThe15，原來全世界有15%人口係傷殘），而輪椅佔嘅空間更多，再加上器材，例如撞正有競輪嘅話，基本上可能一架輪椅已經打爆咗架𨋢。所以最大問題就係等𨋢，絕對要預好足夠嘅時間去搭𨋢，試過亞運真係搞唔掂，有啲隊伍就將運動器材放曬喺樓下，淨係個人行落樓梯一拎器材就走得，變成行樓梯才是正常，有𨋢搭係bonus。

有無睇過杜文澤面對住天敵電磁爐時嘅樣？我哋等𨋢個樣都應該差唔多，好彩今次殘奧人數唔多而且比賽時間分散，爭電梯搭情況唔算爭得好嚴重，不過就多咗樓層迷宮，開頭成日蕩失路

迷宮一樣，仲要唔係每一層間隔一樣

有人可能會問村裏面住宿嘅地方係咪好似酒店？咁雖然房間係全新，但當然冇咁多設施，例如通常都唔會有雪櫃或者係電視。其實係可以有嘅，不過呢啲通常都係額外要畀錢先會加到嘅設施，咁就未必會係每隊都會畀錢加嘅，反正會有common area有電視可以睇比賽直播，又或者有啲地方係可以畀運動員social或者消閒娛樂。

咁係唔係所有人都會入住選手村？其實又唔係，基於安全或者比賽考慮，例如部份運動比賽場地比較遠離選手村，咁隊伍就會考慮住去出面，有時亦都會有第二條選手村畀佢地住。又或者係一啲比較出名嘅運動員或者隊伍，佢哋都係會自己喺出面搵地方住或者搵大會安排，唔會住喺選手村入面引起混亂。你唔會見到成隊明星球隊係村入面出現，同你一齊喺飯堂排隊拎嘢食。又例如非教練運動員，今次醫療團隊嘅人同採訪人員都係住喺村外邊酒店，大會呢個安排亦都引起咗一啲因為疫情相關嘅報導同埋關注。其實都幾勁，殘奧期間一個確診武肺嘅人都無，記憶中奧運期間差不多每日都有人確診。

今次每幢樓樓下都會有common area，不過唔知點解我哋嗰個區域嘅樓common area就比較細，得張枱仔同部電視，人哋嗰啲要有電視又有梳化。另外今次幢樓好得意好似迷宮，同一幢樓又唔係每層一樣，條走廊就loop返轉頭嘅，最抵死係兩架𨋢同樣落B1車場同洗衫樓層，一架𨋢直接落到去另一架𨋢就會差半層，要行樓梯，健全人士就無咩所謂，傷殘人士如果搭錯𨋢就唔好意思喇，唯有搭返上去地面，行去搭另一架𨋢先落到去。

講完住宿，就去村內其他地方睇吓，最受人關注應該係村裏面嘅廣場，廣場裏面有好幾間舖，最重要嘅係有運動員形容係黑洞嘅紀念品鋪頭。廣場個靚樣同入面有咩鋪頭就睇片啦。

[embed]試過用手機拍片，質素真係差好遠，呢幾條片都係用手提自拍器拍嘅。有無睇過 The Blair Witch Project？手機拍應該會睇到暈

[embed]吸錢黑洞

除咗黑洞同其他商店，要成為一個社區畀人生活，一定要有消閒設施，今次有個公園畀人hea、跑步做運動，公園入面仲有間房有按摩凳，不過就冇入過去啦，另外仲有個五環 / 三撇logo打卡位喺公園入口。

公園入口打卡位，呢個唔係成日上網報導見到嗰個大logo，大logo喺彩虹橋我哋去唔到

其餘設施就放晒去Multi-Function Complex，同一幢大廈樓下係Clinic、一樓係Recreaction Center加Casual Dining Hall，樓上就係Gym房。個Recreaction Center唔大，殘奧時唔多人就OK，唔知奧運時個Recreaction Center有咩玩，但係殘時就有一樣好特別嘅遊戲機玩：硬地滾球，部機有攝影機自動計分，畀完全未玩過嘅人體驗呢樣運動。

[embed]Recreation Center

Gym房非常大，亦都有針對殘疾人仕用嘅器材，不過整個set-up比較臨時。

[embed]之前講過拍片其中一個目的係一個字肥企劃，學下點樣edit一條片，所以gym房呢條片條片加咗比較多effect，驚睇鬼片就自己諗睇唔睇啦

下一篇將會係最後一篇，「行」。