How to…裝響片

響片通常係一塊金屬片，上面有幾個窿，再加上一粒螺絲，用黎裝上把弓度，貌似無咩嘢可以調較。另外有啲款係一舊嘢夾住個瞄準器或者貼上瞄準器上，再用一支金屬棍仔夾住箭，呢類響片通常係畀青少年及比較初學射手使用，因為射手技術未穩定又或者拉距經常變，為免要成日去換箭或者cut箭，裝喺瞄準器上嘅響片提供較大調整幅度，即使箭太過長伸咗出去弓身外邊亦都無問題。

正因為響片本身可以調較嘅嘢唔多，有需要調整時，可能需要直接買過另一塊響片先可以做得到。唔同牌子唔同型號嘅響片各有分別，所以講裝組、調整前必需先回帶去講吓點樣揀一塊啱用嘅響片。呢個喺器材選擇幾篇文裡面並無提過，一嚟響片唔係初學者應該使用嘅器材，「奧運射手的基礎射箭知識」內提到，射手應待「於開滿弓拉到最長距離時的感覺一致」時，先開始使用響片。意思係射手應先學習拉到一個合適拉距並重複做得準確，而唔係利用響片限制射手未穩定嘅拉距，呢個諗法有少少矛盾，而且執行上有難度，之後再講。二嚟響片需要配合其他器材，如果只當佢係獨立一件器材睇，就會忽略咗佢同弓身或者其他器材嘅關係及影響。

響片第一樣諗到嘅可能係聲音夠唔夠響，但大聲並唔係最重要，應該先考慮嘅係穩唔穩陣、準唔準確，其次長度及厚度亦都重要，之後先到響聲。

穩固

螺絲嘅尺寸大細係第一樣必需要留意嘅嘢，因為並唔係每一個牌子嘅弓身都開統一大細螺絲啞用嚟裝響片。如果係一啲比較特殊嘅螺絲尺寸，就未必每一個牌子嘅響片都有提供適合嘅螺絲。雖然有啲牌子都知道自己弓身用嘅螺絲啞非常唔common，會提供埋螺絲畀你，但無買錯就最方便。

紫色Hoyt螺絲啞係大路尺寸，但把黑色Sky個螺絲啞就要另外搵螺絲上了

唔穩陣，射射吓自動移位，應該係關於響片最唔想見到嘅狀況。有時會諗，係唔係螺絲越細粒就越難上得實塊響片？經驗上我覺得鬆緊同螺絲尺寸無乜關系，同時落唔落塊膠墊、好唔好另外加粒介子等之類全部都無乜影響。 響片上實晒螺絲都係仲郁嚟郁去，最大可能出事嘅位反而係把弓身，如果finishing 係漆油仲要面頭係勁滑嘅光油，好多時將螺絲扭得幾實都無用，響片依然係會走位。另外搭箭嘅手法都有影響，例如習慣用箭撩開塊響片搭箭，相對就比較容易推郁響片。

響片移位係必然存在嘅風險，所以必需要mark好自己響片位置，我習慣用漆油筆直接劃落弓身或者響片延長金屬片度mark位，咁就盲嘅都睇到。而有啲人會喺打遠距離嘅時候將響片較出少少，咁就更加有需要mark清楚唔同距離響片嘅位置。

精準

即使響片穩陣唔容易鬆，亦都唔代表一定好精準。簡單一塊金屬片嘅響片正常都無大問題，但裝喺瞄準器上面供初學者及青少年用嘅響片， 本身有可活動部份，虛位就比較多，設計上比較容易前後搖動，相對無咁精準。而呢類型響片亦都有其他壞處，下面再講。當射手拉距穩定、技術提升到比較高水平時，就唔建議繼續使用呢種響片，都係換返金屬片比較好。

近年有啲新產品話要保持塊響片同箭桿垂直，話咁樣比較精準。而該款響片仲有另一個賣點，係可能微調響片位置，後者反而比較實際。呢兩個賣點都未吸引到我去試用呢啲產品，反正用咗廿幾年都係打斜嘅響片，並唔見得唔準確。反而我會覺得，習慣咗響片係斜嘅，變咗垂直我未必習慣，特別係用箭撩開響片搭箭時。

長度

各款式響片長度不一，但我見唔到有邊個牌子提供官方數據，交待長度資料

長度係響片其中最重要而又有機會可以調較嘅嘢，響片上有幾個窿，又或者可以成塊移上移落，而弓身好多都有兩個螺絲窿裝響片，全部都可以調較響片長度。

（左）用尾二短嘅螺絲窿位，響片遮唔晒箭桿；（右）用長一格螺絲窿位，響片完全遮蓋箭桿

響片需要完全遮蓋箭桿，唔能夠只遮一半，因為拉過響片時機會變得唔穩定，箭亦都有較大機會彈起。

隨便搵兩把弓身去比較，已經見到螺絲窿去到墊桿嘅距離都唔同，如果響片本身比較短，又需要向前伸出去比較遠，咁就未必夠長遮蓋箭桿。有部份型號弓身有金屬片伸延出去，而且延長片非常長，供響片打落去，但如果響片根本不夠長，咁無論伸延幾遠都形同廢物。呢個只可以留意返自己個弓身，特別係用啲小眾牌子嘅話。

厚度

厚度呢個比較特別，即使係Beiter自己嘅網站內datasheet都係寫話唔同厚度畀到你嘅係聲音唔同，但於開頭我已經提過，聲音其實只係次要。響片厚度最重要嘅係要配合箭重量及箭側墊彈弓有幾硬。如果用一塊好厚嘅響片，又或者可以理解成比較硬，響片夾實箭時，將箭壓向弓身嘅力度就會較大，同時如果箭側墊彈弓好淋，唔夠響片壓力大，咁就有機會將支箭撳咗埋去弓身度。當拉過響片時，箭側墊彈弓隨即將箭推離開弓身，咁就好大問題，影響準繩度，更甚者有機會將箭推跌出箭托外，造成危險。所以一般係射輕磅弓需要使用薄嘅響片，因為箭通常都會比較輕，箭側墊彈弓亦都比較淋，相反射重磅弓時箭會比較重，箭側墊彈弓比較硬，咁就會用到厚嘅響片 。

類似情況亦都會發生喺裝喺瞄準器上面嘅響片度，雖然金屬棍仔無得揀「厚度」，但按照安裝方法及位置不同，將會改變棍仔壓向箭桿嘅力量，而且通常都被迫要較到壓力好大，否則拉過響片後，棍仔會郁得太慢。

聲音

終於黎到夠唔夠大聲呢個問題，但首先我哋有需要搞清楚一樣嘢，聲響並唔係響片唯一嘅回饋，射手同時用緊唔同感觀去感知幾時拉過響片。有射手會喺臨近開滿弓時眼望向響片，以檢查拉距同時確認動作準確，而當技術達到一定水平時，其實係可以感覺到響片開始從箭頭尖壓向弓身，所以並唔係只能依賴聽到響聲先知道拉過響片。當環境非常噪吵，又或者天氣惡劣狂風暴雨時，其實大家都唔係完全單靠聽響片聲去撒放。

雖然係咁，但我哋始終係對聲響有要求，希望響片大聲啲，又或者聲音清脆實淨啲，咁自然就會想用塊厚啲嘅響片。Beiter寫明響片厚度有得揀.25或.30，近年更新增.20，但我就發現Win&Win其實更大聲更清脆。

（上）Win&Win大聲過（下）Beiter 0.25

而我用過最大聲嘅響片無牌子台灣自製（樓上長度圖中正中間一塊），仲要有位凸出，打落弓身度非常大聲，用得耐仲會打到弓身或者延長片有花痕。

好多射手會用盡方法令響片大聲啲，有人會拆咗響片末端塊膠cap，令到金屬片直接打落弓身度，咁就一定更加大聲。但我唔鍾意呢個做法，因為唔大聲得幾多，而且搭箭上響片會變得比較難，如果弓調得唔好又或者意外地未拉過響片就撒放，會有更大機會打甩箭毛。

另一個方法係拗孿塊響片，希望打落去弓身實淨啲大力啲，有無用可能要睇個別情況而定。但要留意並唔係每塊響片都拗得，Beiter寫明銀色可以屈，但黑色唔屈得。原因好簡單因為佢話屈黑色嘅有機會屈斷。而如果塊響片係用炭做嘅，就更加唔建議亂試。

位置

響片有兩個用途，一係控制拉距，二係控制節奏，先按拉距預設好響片位置，再進行微調可以控制節奏。上面提到應先將動作做準，開滿弓拉到最長距離感覺一致先開始用響片，但好多時唔用響片，練習時又點知自己拉得咁唔準？即使係非初學者，突然唔用響片，可能都會發現拉距好難做得準。相反如果嘗試用響片決定拉距，又點響片位置設置得正確，開弓時係拉到「最長」而唔係「過長」？呢啲都係實際執行時嘅問題同矛盾。

要決定響片位置，最理想自然係基礎動作合理穩定之後，等教練幫你搞，再喺有需要時幫你調整，退一步可以搵其他射手幫你睇位。但萬一真係無人幫到手，唯有自己嘗試調整響片位置，方法係用近光靶，專注拉滿弓動作舒展穩固，先將響片調整到即使開滿弓靠弦依然未會拉過的位置，再逐少逐少推前響片，每個位置重複試拉兩三次，直到開滿弓靠弦時就剛已拉動響片。再將響片回縮大概兩三分（1/4至3/8寸）預留位置伸展用。啱啱開始學習使用響片嘅射手就需要預留到再長一啲距離，大約半寸左右，待適應後再調整位置。

其它

再講多少少裝喺瞄準器上面嘅響片嘅潛在問題，雖然佢容許調較位置嘅幅度好大，但唔係話咁就可以完全唔理箭長，箭太長重心喺把弓出面，箭側墊對唔上應該壓向箭桿嘅位置，兩樣都係問題。

金屬棍仔通過都好長，未必容易切短或者屈曲

另外需要留意嘅係如果金屬棍仔嘅位置貼近弓身，由於棍仔通常都好長，撒放之後就有機會插親手指見紅。