星期日休息：邊個整死 傳統媒體

團結香港基金(或者叫做瓜香港基金正確啲)下面嘅思考香港，搵個唔知乜水寫文章話美國年青人重投 傳統媒體 懷抱，當然美國年青人重投 傳統媒體 懷抱，同美國其實好多亂寫一通嘅網媒有關，但另一方面，如果要香港人重投乜嘢 傳統媒體 ，首先叫中聯辦執咗佢算，中聯辦一日喺後面搞啲傳媒， 傳統媒體 死係正常，唔死就代表香港人智商唔正常。

邊個整死 傳統媒體

我同唔少網媒人唔同地方在於，其實我係由 傳統媒體 起家，至少我一開始寫嘅幾份報章，喺好多人眼中係屬於上一代嘅世界，但我亦知道點解呢啲媒體點解死，係唔駛互聯網大潮已經死咗。好似商台咁，商台自2004年後都無辦法重振當日嘅影響力，好簡單，你俞琤自己聽中聯辦點要趕走啲名嘴，你就玩完。就算日後發現果兩件名嘴其實都係有問題，但唔代表當年商台嘅做法係啱，事實上，俞琤一手摧毀商台嘅公信力，所以依家好多人寧願信香港電台，香港電台至少仲有有心人以維持公共廣播為自己嘅職志，就係咁簡單嘅事。

好似信報咁，呢份本來係我睇開嘅報紙之一，亦係寫開嘅報紙之一，但點解搞到依家咁，搵郭艷明接管之後，人唔似人，鬼唔似鬼，信報最值錢係果堆作家，以及唔買各大行帳嘅財經分析，依家信報剩番啲乜嘢狗屎垃圾，一個連人地嘅種族都可以亂寫嘅老屎忽都可以留喺度，定係成堆大行嘅廣告，財演寫嘅所謂財經分析，你叫我依家訂信報？傻仔就會咁做囉。

再講一個經常例子，點解TVB啲人咁憎佢，除咗啲劇集九唔搭八，製作水平同依家西方社會要走向電影級製作嘅大勢背道而馳外，佢啲新聞完全係中聯辦嘅意識形態機器，由六點半新聞到東張西望，都係扭曲事實，連限奶令係葉劉淑儀發起咁講都夠膽死，袁志偉當我唔存在，我係唔係要寫信去通信局，佢接到警告信至當我存在咁？所以原本係香港嘅文化標誌嘅TVB，依家冠上CCTVB之名，好多人喺TVB做都被人當過街老鼠，咪多謝中聯辦，同埋袁志偉呢啲咁嘅太監，仲有黎瑞剛背後所代表嘅黨資金，香港 傳統媒體 公信力完全被摧毀，同互聯網無乜關係，因為互聯網都只不過係一個載體，真正嘅問題，其實係嚟自香港 傳統媒體 果種自我閹割。

當然，香港好多媒體嘅成本控制都係唔爭氣，一味只識得cut人人工，但傳媒最值錢係人，唔係應該減少不必要嘅門面開支，同埋炒咗啲白痴管理層，好似有啲管理層嘅人工，根本唔值呢個錢，除咗剛才提及嘅郭艷明、袁志偉，好似李寶安呢啲廢人，點值呢個錢，不如用啲錢請好啲編劇，同埋請番陳志雲做管理層好過，至少陳志雲有心做前線工作，佢知道前線工作嘅價值。李寶安除咗喺個Excel Spreadsheet上郁嚟郁去，佢仲識啲乜，如果可以用Spreadsheet嚟管理一間公司，不如搵個Excel狂人去管咪得囉。公司嘅營運，好多時唔應該只係睇表面數字。

要重建 傳統媒體 公信力，當然第一步係趕走中聯辦，因為一日呢個機構仲喺度，呢班仆街黨委指指點點，傳媒好難生存。但另一方面， 傳統媒體 要做好自己之餘，亦要迎接傳媒收入模式嘅轉變，同埋當你傳媒受眾全世界都有果陣，你必須係面向全球華人，只不過，依家香港所謂面向全球華人，只係面向中國，以及中國走出嚟果啲人，果啲人有乜嘢水準，大家心中有數，一班友無諗住走出依家香港嘅困局，諗住走到另一個困局仲以為自己有得分，呢個真係傻到無得救嘅地步。

其實呢幾年，我聽得太多香港媒體人自怨自艾，要生存，唔係靠吓吓X群眾，始終路係要搵出嚟，好不幸，有太多人根本唔願意面對成個困局背後嘅原因，甚至覺得自己做得好正確，好似郭艷明咁，當好多信報舊人Tag佢要佢留意啲仆街嘢果陣，佢係Untag你，然後仲以為自己做得好正確，係囉，睇吓幾時信報無人買，大行唔落你啲老土廣告果陣，邊個理得你。連UBS瑞銀都寧願落廣告喺蘋果，俾幾個新人做股票傳心師節目果陣，我唔認為信報可以keep到花旗銀行張廣告合約好耐囉。

如果話2000年我入iChannel跟王維基最大得著係乜，佢果種你必須諗盡辦法求存之道，係重要，否則點同中共呢啲黐線人鬥命硬？